行山兄弟 投資研究所

為防止「擠提事件(Bank Run)」發生，聯儲局實施緊急措施救存戶，但係就唔會救矽谷銀行，市場認為爆煲事件已經響起聯儲局警號，認為「經濟衰退 / 金融危機」係聯儲局底線，聯儲局應該不能再「加息」，否則後果嚴重。 基於以上原因，市場大量沽出美國銀行股，或者將資金完全抽調，脫離銀行體系，買入債券，債券價格大升，美國兩年期債息由5厘跌至4厘，十年期債息亦由4厘跌至3.5厘；這個利率變化同時影響「新興市場」估值，暫時市場豪賭行為，主要係預示CPI 降溫以及FOMC 結果，簡單講就係市場賭FOMC 加息週期完結。 週末過後，本來翻起驚濤駭浪，但係呢一大浪好快過去，市場又冷靜落嚟，注視未來CPI數據。 恒生指數昨日回升400點，再次觸及黃金比例38.2%阻力位19600點，但係單日反彈唔代表轉勢，MACD、RSI、短線市寬(3天vs 18天線)、強弱指數訊號全部屬於弱勢，第一可能係大市復甦而其他股票未訓醒，另一可能係只係超賣反彈，彈完若果冇承接(Follow-Through)，就會再進一步調整，我暫時相信後者。 下星期騰訊公佈業績，業績公佈期一般市況比較波動，經濟好境就話會炒高，但過去一年經濟非常差，業績公佈都唔會有好消息，只係「好過預期」抑或「差過預期」。 VHSI 今日已經升至29水平，以往大型恐慌場面都係32至40之間，3月內可能會有更大波動事件發生。

過去一周發生兩件事，其中為聯儲局主席鮑Sir 對「通脹受控」唔樂觀，認為有必要需進取加息，「加息預期」升溫，十年期美債升至4.0%。 恒生指數下跌，並出現Lower High Lower Low 的下降Pattern，主流認為係市場對「息口頂點」不確定，係高債息情況下，基金重估新興市場投資價值（就係沽出高PE股票）。 星期五晚，美國「非農就業數據」公佈，數字雖然高，但係失業率已經上升，代表就業人數減少，失業人數提升，通脹已經開始降溫，十年期美債升降3.8%（係比較顯著減少）。 另一件事，係同一晚，矽谷銀行爆煲，兩日之間已經被接管，矽谷銀行(SVB) 因為早前過份投資美債以及按揭投資過多，回籠資金不足，但係存款金額減少（因為科技公司係高息環境之下難以融資，唯有使用銀行現金），出現銀行流動性短缺問題，如果銀行界有三條紅線，可能佢已經越過哂三條。 美國金融市場下跌，道指跌1.07%，納指跌1.76%，標普500跌1.45%，本來十年期美債回落，應該係利好股市，但反而倒跌，代表「相比通脹受控，市場更驚系統性風險」，加息恐懼已經係上年十月反映，今次加息驚極有個譜，但係銀行倒閉就完全估唔到，暫時市場未知有幾多間「翻版矽谷銀行」，矽谷銀行爆煲前市值為300億美元，大約等於香港二三線銀行，例如集友、富邦、創興銀行等等，如果大量中型銀行向大型銀行借貸，然後倒閉，係有可能出現骨牌效應。 市場對未知的事情往往充滿恐懼，未來一週投資主題將係「雷曼2.0」，十年期美債息再升3.8%跌至3.7%，未必係預期息口降低，而係有基金避險，大量沽出股票換成債券避險。