「預測從唔可靠。你投資即表示願意自己嘅資金承擔風險。因此，千萬不可冒你承擔唔起嘅風險。連銀行都會投資錯誤，何況係一般人？」
曹仁超
美國聯儲局講到十分兇狠，無論加幾多息，都要將通脹呢頭「猛虎」做低，到底通脹有幾嚴重呢？
上一次應對通脹，已經係2008年咁嘅事，美國CPI 增長由2007年7月開始，越升越快，到2008年12月先停止，升足一年零四個月，但停止升唔代表物價回落，之後半年，CPI開始負增長，物價就回落返。
物價高企嘅日子，原材料（金屬、原油）價格上升，令到企業成本上漲，大企業唔想硬食，會將通脹呢個波傳俾啲細嘅，細嘅公司食唔落，唯有將價格提高，等消費者埋單；有啲食唔落，又冇能力加價嘅公司，可能會虧損，甚至倒閉。
睇舊數據，2007-2008年幾乎全世界GDP都倒退，中國當時GDP都由14.9%跌到6.2%，增長速度減半。
歐元區 - GDP
美國 - GDP
日本 - GDP
中國 - GDP
當年美國由2016年12開始加息，一直到2018年12月加完，歷時兩年，每次25個基點，加咗8次，聯邦基金利率由0.25%-0.50% 加到2.25-2.50%，最終加2厘。
今次CPI增速比2007年仲猛，上次最高年增速5.5%，今次係8.56%，單純用數學計算，猛過上次1.5倍，或者最終要加3厘先夠。
2007-2008年，美國債息維持喺4%至5%，今時今日債息係2.76%，仍然有好大向上空間，聯儲局會唔會加息對抗通脹，攪到股市崩盤呢？答案就係唔驚得咁多，你地自己搵位著陸啦。
人類係好容易忘記歷史教訓，所以睇吓2008年5月24日嘅舊聞，可以重溫一吓歷史嘅教訓。
2008-05-24 投資者筆記
超級泡沫爆破
2007年8月起貝南奇透過注資及減息去減少次按危機嘅殺傷力，搞到美元回落及全球性通脹。今年4月美國消費者稅後收入較2007年同期上升 4.1％，但日用品平均嘅售價反而上升10.4％，代表一般人嘅生活水平將下降；情況就好似七十年代嘅滯脹期。1979年年底雪茄伏出任聯儲局長就用高息對付通脹，搞到1981╱82年衰退先將通脹率馴服。今次又點？
喺滯脹期（Stagflationary Environment）耐性係好重要；商品價格此起彼落、食品價格及能源價格就係咁升；反而樓價同股價就唔升，雖然利率由5.25厘跌落2厘。個個都希望射中牛眼，結果就成日誤中副車。好似索羅斯所言：「我地正進入財富嘅破壞期。例如中國正面對高通脹嘅威脅，加埋出口增長率放緩，前景都幾令人擔心。」索羅斯認為，呢個次按危機係超級泡沫爆破，一個由列根總統時代已開始，超過二十五年日子嘅泡沫已爆破。
熊市反彈從來唔易玩，尤其係聯儲局响5月5日前已結束減息周期，利率由去年9月5.25厘減至今天嘅2厘，CPI升幅卻係4％。為協助JP摩根大通收購貝爾斯登，聯儲局已接受咗290億美元唔易買賣嘅資產，引發3月17日起嘅反彈。但係由5月5日起，股市開始無定向，時好時壞。
新興國家股市正係重犯七十年代OECD國家相同嘅錯誤。阿根廷通脹率已達23％、俄羅斯14％、沙地同印尼達9％（正在走向12％，如果印尼宣布取消汽油補貼）、中國達8.5％及智利8.3％。政府過去透過補貼或控制物價，阻止CPI上升，一如1972年尼克遜宣布凍結物價一樣；結果一取消後，物價就飛升。依家佔全球三分二人口嘅新興國家人民正面對通脹率走向雙位數（例如中國食物價格上升22％、非食物價格上升1.8％，政府已宣布物價管制；印度則取消唔少商品期貨交易去打擊通脹上升，但長遠而計，咁樣做害多於利）。新興國家CPI升幅大過OECD國家，理由係食品佔CPI比重30-40％，响 OECD國家就唔夠15％。
香港由1990至97年嘅情況係港元滙率偏低，以及香港政府唔俾港元升值，搞到本港通脹，樓價由2000元一呎升到12000元；薪金升咗三倍。 1997年7月至2003年7月樓價跌咗65％，出現Boom & Bust。上述情況2003至07年喺中國發生，樓價狂升，自2008年起樓價出現調整。滬深A股由2007年10月17日5891.72，跌落2008 年4月22日3122點，跌幅達47％，因政府宣布減印花稅而反彈；恒生指數由1997年8月7日16820點，跌落到1998年8月13日6544點，跌幅61.9％，亦因政府入市干預而回升。雖然恒生指數由1998年8月13日回升，但本港樓價卻一直跌到2003年第三季才止跌回升，相同情況會唔會喺內地出現？係一個好值得思考嘅問題。
真正壓抑CPI嘅方法係將利率推高至CPI增長率之上，咁樣做必引發短期衰退，令新興國家（包括中國）央行面對兩難局面。而家大部分新興國家仍處負利率期，貨幣供應增長率仍高達20％（俄羅斯更達42％），最終新興國家經濟會唔會出現1981╱82 年美式衰退？以中國為例，如將利率推高至CPI增長率之上2厘，立即刺激人民幣滙價大幅升值，雖然可令CPI嘅升幅受控制，但出口嘅能力出現大倒退，令 GDP增長率急跌至6％或以下而引發經濟衰退。如央行唔將利率推高，人民幣只會溫和上升，CPI升幅就解決唔到，最終因通脹嘅問題而削弱中國貨出口嘅競爭力，令GDP增長率回落，喺咁嘅情況下，內地A股响可見將來大方向係向下。 |
留言
張貼留言