投資霖筆記 - 仲有咩方法救經濟

今年初港股幾次大跌，分別由於「中概股在美國退市風險」、「中國疫情爆發上海封城」、「恒大爆煲中國金融體系危機」、「科技股監管無了期」。

為咗防止金融體系崩潰嘅可能性，官方傳媒出咗幾次口術，令股市短期大幅反彈，例如恒指由3月15日由18200點彈至22400點，但冇實體經濟支持，股市好快彈就散，又再尋底。

到底中國經濟係咪真係唔掂呢？

 

睇官方數據，我地知道過去三個季度(2021 Q3, Q4 同2022年Q1)，GDP 增長率係4.9%、4.0%、4.8%，同今年增長目標5.5%有一段距離。

 

中國城鎮失業率由4.9%升到6.1%，年輕人(16至24歲)失業率更達到18.2%，真係達到一畢業就失業嘅地步。

 

經濟差嘅原因有幾方面，一方面喺中國地產業監管太重手，除咗冇人買樓，地產商未整好盤數之前，都唔敢亂買地起樓，相關產業鏈全部都冇生意，減慢經濟循環。

 

另一方面科技巨企監管強勁，龍頭企業 騰訊、阿里巴巴、字節跳動、京都全部都裁員，經濟又差，被炒魷魚嘅失業大軍好難搵到新工，令失業率上升。

 

 

要振興經濟主要靠控制市場資金流動性，央行有兩個方法 – 降準和減息，在2020年疫情開始爆發，央行曾經降準1%，向市場釋放出5500億人民幣。

 

＊　信報 2020-03-13　＊

釋放長期資金 支持實體經濟——人民銀行有關負責人解讀定向降準 中國人民銀行13日宣布兩項定向降準措施，共釋放長期資金5500億元。人民銀行有關負責人表示，此次定向降準釋放長期資金將有效增加銀行支持實體經濟的穩定資金來源，降低相關銀行付息成本，促進降低小微、民營企業貸款實際利率，直接支持實體經濟。 人民銀行13日宣布，決定於3月16日實施普惠金融定向降準，對達到考核標準的銀行定向降準0.5至1個百分點。在此之外，對符合條件的股份製商業銀行再額外定向降準1個百分點，支持發放普惠金融領域貸款。以上定向降準共釋放長期資金5500億元。 人民銀行自2018年起建立普惠金融定向降準年度考核制度，對普惠金融領域貸款佔比達到一定比例的商業銀行，給予0.5個百分點或1.5個百分點的準備金率優惠。考核對象包括大型銀行、股份制銀行、城商行、較大的農商行和外資銀行。

 

當時貨幣流通量 M2 增速由8.80%升至10.10%(+1.3%)，然後3個月達至11.10%，股市跟住回升。

 

今次經濟數據同樣差，中國央行於4月25日宣佈降準0.25至0.5個百分點，力度係2020年嘅一半，M2數據由9.70%升至10.50%(0.8%)，算係「好過冇」。

 

降準後A股(上證指數SSE)見底，三個星期內由2867點升至3146點(+9%)；恒指三個星期由20000點升至20700點(+3.5%)。

 

雖然股市回升，但係現時嘅政策係咪足夠就值得商確，要睇未來GDP同就業率有冇見底，同埋會唔會受通脹影響，驚就再落藥，唔驚就見定啲。

但係央行可以再用嘅招數未必好多，因為美國開始加息，美國10年期債息已經有2.78厘，中國10年期債息只有2.83厘，中國一旦減息，美國債息高過中國債息，會觸發市場大量沽出中國債券換成美國債券，到時中國要再發行人民幣債券就冇人買，所以央行未必會「減息」，可能減完３個月又加就白做。但即使今時今日中國唔減息，美國2022年可能再有兩次加息0.5厘，到時同樣情況都會出現。中國如果唔跟住加息，仍然要面對走資問題，到時候如果中國揀加息（商家向銀行借錢要加息），經濟咁差仲頂唔頂得住呢？

 

央行仲會用咩政策，係外圍加息之前挽救經濟呢，可能呢兩個月就會知道。